varahagiri venkata giri information in marathi

वराहगिरी व्यंकटगिरी हे भारताचे चौथे राष्ट्रपती होते. भारताच्या स्वातंत्र्यासाठी ते प्राणपणाने लढले. पुढे त्यांनी महात्मा गांधींचे अहिंसावादी तत्त्वज्ञान अंगिकारले. मजुरांचा संघटक म्हणून कार्याला सुरुवात करून पुढे त्या कार्याचे सनदशीर चळवळीत रुपांतर करणारा महान नेता म्हणून ते प्रसिद्ध आहेत. आपल्या राष्ट्रीय इतिहासात त्यांनी केलेल्या कार्याचा गौरव साऱ्या देशवासियांनी केला आहे. श्री गिरी यांचे सार्वजनिक आयुष्य विविधरंगी आणि विस्तृत आहे.

राजकारणी, धडाडीने चळवळ चालविणारे, क्रियाशील, मुत्सद्दी, अनुभवी सल्लागार अशा अनेक क्षेत्रात ते यशस्वी ठरले आहेत. श्री. व्ही. व्ही. गिरी यांचा जन्म १० ऑगस्ट १८९४ रोजी ओरिसामधील बेहरामपूर या गावी झाला. त्यांच्या वडिलांचे नांव व्ही व्ही जोगिया पंतुतू. वयाच्या १२ व्या वर्षापासून छोट्या गिरींनी सार्वजनिक कार्याला सुरवात केली. आपल्या गावात तरुणांची एक संघटना व युवक मंडळ काढले.

varahagiri-venkata-giri-information-in-marathi

१३ व्या वर्षी गरीब विद्यार्थ्यांसाठी आर्थिक मदत देणारी संघटना काढली. सिनीअर केंब्रिजची परीक्षा पास झाल्यावर श्री गिरी हे १९१३ साली कायद्याचा अभ्यास करण्यासाठी ब्रिटनला गेले. तेथे त्यांनी आयर्लंडमधील डब्लिनच्या नॅशनल युनिव्हर्सिटी ऑफ आयर्लंड या संस्थेत नांव दाखल केले, त्या काळात आयरीश लोकांचा स्वातंत्र्यलढा तीव्र स्वरुपात चालू होता. डी. व्हॅलेरा यांचे तेजस्वी नेतृत्त्व जनतेला लाभले होते. गिरी या आंदोलनाकडे आकर्षिले गेले.

त्यांनी आयर्लंडमधील भारतीय विद्यार्थ्यांना संघटित करुन त्यांची एक संस्था स्थापन केली. त्यावेळी गांधीजी दक्षिण आफ्रिकेत वर्णविद्वेषी धोरणाविरुद्ध लढत होते. याचा परिणाम म्हणून गिरी यांच्या मनात आपल्या देशाच्या पारतंत्र्याबद्दल खंत निर्माण झाली. त्यांनी साऊथ आफ्रिकन हॉरर ' या नावाची छोटी पुस्तिका लिहिली आणि अत्याचाराविरुद्ध पत्रके छापून भारतात पाठवली. १९१४ मध्ये पहिले महायुद्ध सुरु झाले. महात्मा गांधींच्या व्यक्तिमत्त्वाने भारावून जाऊन गिरी यांनी रेडक्रॉसमध्ये नांव दाखल केले.

परंतु गांधीजींच्या ब्रिटीश सरकारला सहकार्य करण्याचे धोरण न पटल्याने अखेर त्यांनी राजीनामा दिला. १९१६ मध्ये इस्टेर क्रांती झाली. गिरी यांच्यावर झडतीचे वॉरंट बजावण्यात आले आणि १ जुलै १९१६ ला त्यांना ब्रिटनमधून हद्दपार करण्यात आले. परत आल्यावर श्री. गिरी यांनी मद्रास हायकोर्टात अॅडव्होकेट म्हणून काम करण्यास सुरुवात केली. १९१७ मध्ये त्यांचा विवाह झाला. १९१८ मध्ये त्यांनी वैयक्तिक सत्याग्रहात भाग घेतला. तेव्हापासून त्यांनी काँग्रेसच्या कार्यात स्वत:ला झोकून दिले. १९१७ ते १९२२ गिरी हे काँग्रेसचे क्रियाशील सदस्य होते. परंतु त्यांच्या मनाचा खरा ओढा कामगार संघटनेकडे होता.

त्यांनी रेल्वे कामगारांची अखिल भारतीय संघटना निर्माण केली. आयुष्यभर त्यांनी कामगारांच्या हिताला प्राधान्य दिले. १९५४ मध्ये गिरी यांच्या जीवनात मोठा कसोटीचा क्षण आला होता. ते केंद्र सरकारमध्ये मजूरमंत्री होते. मंत्रिमंडळाने बँक नोकरांच्या हिताविरुद्ध निर्णय दिल्यावर त्यांनी मंत्रीपदाचा राजीनामा दिला. सार्वजनिक जीवनाचा त्यांचा अनुभवही मोठा होता. त्यांनी तीन राज्यांचे राज्यपालपद भूषविले आहे. सिलोनमध्ये ते भारताचे हायकमिशनर होते. ते उपराष्ट्रपतीपदावरही होते.

१९६२ ते १९६७ श्री गिरी हे भारताचे राष्ट्रपती होते. आपल्या राष्ट्रपतीपदाच्या कारकीर्दीत त्यांनी सतत कामगारांच्या हिताचे रक्षणच केले. भारतातील मालक व मजूर या परस्पर विरोधी गटांना सांधणारा दुवा म्हणून त्यांनी जे काम केले ते अत्यंत महत्त्वपूर्ण होते.